Jesús Castro Yáñez recibe o seu Premio Pérez Parallé

Onte á noite, na sede do Círculo Mercantil e Industrial-Unidade, en Fene, foi entregado o XXVIII Premio Nacional de Poesía Xosemaría Pérez Parallé ao gañador deste ano, o poeta chairego Jesús Castro Yáñez.

jesus_castro

Entregaron o galardón o alcalde de Fene, Juventino Trigo e o presidente do Círculo, José Manuel Romero.
O acto pechouse, como é habitual, coa actuación da rondalla Estrelecer do Círculo Mercantil.

mesa

O autor recibiu o galardón pola súa obra Os cantos e os himnos. O xurado do Premio, integrado por Estíbaliz Espinosa, Fran Cortegoso e Estevo Creus escolleu a obra de entre as 27 presentadas considerando que “conforma un libro orgánico, con vontade de medrar en cada parte (desde o Nome ao Himno) e unha procura metafísica a través da lingua literaria. O tema da identidade a través do nomeamento do mundo, a sonoridade líquida da lingua e o uso dunha linguaxe clara para unha poesía que camiña por territorios que poden soar familiares (o xardín, o río) mais rozando certa abstracción. Unha poesía fonda e de teor filosófico que adentra en preguntas sobre o ser e o territorio. A voz do libro é unha voz limpa e nova, mais cunha madurez lírica considerable.”

O Premio Pérez Parallé outorga ao autor da obra gañadora 1000 euros e unha peza de cerámica de Sargadelos co retrato de Pérez Parallé da autoría do debuxante Siro, que é a imaxe do Premio desde hai máis de dez anos.
O libro será publicado pola editorial Espiral Maior e presentarase en Fene no próximo mes de maio.

Jesús Castro Yáñez obtén o XXVIII Premio Pérez Parallé

O xurado da XXVIII edición do Premio Nacional de Poesía Xosemaría Pérez Parallé, formado por Estíbaliz Espinosa, Estevo Creus e Fran Cortegoso, escolleu hoxe o libro Os nomes e os himnos como obra gañadora da edición deste ano do certame.
xurado_paralle_2015
Aberta a plica, descubriuse o nome do autor: Jesús Castro Yáñez, poeta nado en Baltar, A Pastoriza, en 1992.
O gañador obtivo, antes deste, outros premios pola súa obra poética: o Minerva, o Xela Arias ou o Ánxel Casal son algúns deles. Recentemente foi galardoado co I Premio de relato breve Nélida Piñón do concello de Cotobade polo relato “O vello e o minotauro”.
O Premio Pérez Parallé, convócase desde hai xa case trinta anos no Centro Mercantil e Industrial Unidade, de Fene. Colabora con el o Concello de Fene e a editorial Espiral Maior, dirixida polo poeta Miguel Anxo Fernán Vello, que publicará a obra gañadora.
O próximo sábado 21 de novembro terá lugar na sede do Círculo Mercantil a entrega dao premio, nun acto que contará coa presenza de Juventino Trigo, alcalde de Fene e coa actuación da rondalla Estrelecer.